Д.Амарбаясгалан:МАН-ын даргад нэр дэвшинэ гэдгээ албан ёсоор мэдэгдэж байна

УИХ-ын дарга Д.Амарбаясгалан МАН-ын даргад өрсөлдөхөө албан ёсоор мэдэгдлээ. Тэрбээр "Улс төрийн нам өдөр бүр шинэчлэгдэн өөрчлөгдөж, дэлхий, нийгмийн асар том өөрчлөлт, шинэчлэлтийг мэдэрч чаддаг байж амьд оршин тогтнож иргэд, залуу үеийнхээ дэмжлэгийг авч чаддаг. 100 жилийн түүхтэй Монгол Ардын намыг хувь хүний бус хамтын удирдлагын байгууллага хэвээр хадгалахын төлөө, 300,000 гишүүнтэй МАН-ын иргэд, сонгогчдынхоо өмнө амласан том амлалтыг биелүүлэхийн төлөө, МАН-ын ерөнхий нарийн бичгийн даргаар 8 жилийн туршид ажиллаж, шинэчлэлт, өөрчлөлт, дэвшилтэд үзэл санааг улс төрийн намын үйл ажиллагаанд нэвтрүүлэхийн төлөө ажиллаж байсныхаа төлөө, удаа дараа намынхаа гишүүдийн итгэл дэмжлэгийг авч ерөнхий нарийн бичгийн даргаар сонгогдож ажиллаж байсныхаа төлөө МАН-ын даргын сонгуульд нэр дэвшиж оролцоно гэдгийг албан ёсоор мэдэгдэж байна" гэв. 

Мөн тэрбээр, "Монгол улс хувь хүн бус хууль засагладаг эрх зүйт төртэй байх ёстой. Үүний төлөө үе үеийн улс төрийн нам, парламентууд ажиллаж ирсэн гэдгийг хэлэхийг хүсч байна. Хоёр их гүрэний дунд оршиж байгаа Монгол улс ардчилсан Монгол улс, ардчилсан парламентаа улам бүр дархлаажуулж, баталгаажуулж явах ёстой. Хуулийн дор хүн эрх тэгш амьдардаг тэр нийгмийг бодитоор цогцлоох ёстой. Тэр бол Монголын төрийн зорилго байх ёстой" гэсэн юм.