Л.Энх-Амгалан: Ирэх 9 дүгээр сарын 1-нээс сургуулийн орчинд гар утас ашиглахыг хориглоно

Боловсролын сайд Л.Энх-Амгалан сэтгүүлчдэд мэдээлэл өглөө.  Тэрээр "Бид сэтгэлзүйч нараа бэлдчихсэн. Төрийн өмчит 700 сургуулиас 600 орчим сургууль сэтгэлзүйчээ бэлдчихсэн.

Эрүүл мэндийн хичээл нэгдүгээр ангиас орно. Бид аль болох хичээлийн тоог цөөрүүлэх гээд байгаа. Бага ангид үзэж байгаа хичээлийн тоог цөөрүүлэх, гэрийн даалгавар хийх хугацааг богиносгох ажлыг ирэх намраас хийнэ.

Сургуульд суурилсан эрт илрүүлгийн тогтолцоог бид гаргаж ирж байна. Энэ бол нэг, тав, ес, 12 дугаар ангид нь сургуульд суурилсан эрүүл мэндийн эрт илрүүлэг хийе гэж байгаа юм.

Нэгдүгээр ангийн хүүхдийн хэл ярианы хөгжил маш муу байна гэж судалгаагаар гарлаа. Цэцэрлэг дээр 10 хүүхдийн долоо нь хэл ярианы чадвар хөгжөөгүй байна гэх судалгаа гарлаа. Цэцэрлэгүүдэд хэл засалч ажиллуулах зайлшгүй шаардлага гарч байна. Энэ намраас цэцэрлэгүүд дээр хэл зүйч ажиллуулна. Нэгдүгээр ангид элсэн орж ирж байгаа хүүхэд 3500 ярианы үгийн сантай байх ёстой байтал дөнгөж 1000 үгтэй л байна. Хэл яриа муу, ярьснаа, уншсанаа ойлгож чадахгүй байна. Англи хэл гэхээс илүү эх хэлээр нь зөв сайн сургах хэрэгтэй байна. Монгол хэлний хичээл маш сонирхолгүй болчихсон байна. Тиймээс хүүхдүүдийг сурах сонирхлыг нэмэгдүүлэх зорилгоор нэг, хоёрдугаар ангийн сурах бичгийг маш сонирхолтой болгож байгаа. Энэ намраас хэрэглэнэ. Хүүхдүүдтэйгээ эцэг эхчүүд маш сайн яримаар байна.

Ирэх долоо хоногт Боловсролын зээлийн сангийн өөрчлөлтүүдийн талаар хэвлэлийн хурал хийнэ.

Малчдын хүүхдийг 10 нас хүртэл нь сонголт өгье гэж байгаа. Гэхдээ зургаан настайгаасаа эхэлж сургуульдаа хамрагдана. Аав ээжтэйгээ 10 нас хүртэл байна гэвэл холимог сургалтын аргаар явна. Энэ системийг намраас туршиж үзнэ. Малчдын 130 гаруй мянган хүүхэд байна. Үүнээс бага ангид 40000 хүүхэд байна. 20000 нь дотуур байранд амьдарч байна. Зургаа, долоон настай хүүхдүүд дотуур байранд байна гэхээр арай багадаад байна.

Есдүгээр сарын 1-нээс фэйсбүүк хэрэглээг хална. Сургуулийн орчинд гар утас ашиглахыг хориглоно. Фэйсбүүкээр гэрийн даалгавар өгөхгүй" гэв.