МОНГОЛ, СОЛОНГОСЫН ХАМТАРСАН “НОГООН ХЭРЭМ” ТӨСЛИЙН ДӨРӨВДҮГЭЭР ҮЕ ШАТЫГ ЭХЛҮҮЛНЭ

Монгол улс, БНСУ-ын ойн салбарын хамтын ажиллагааны 10 дугаар хуралдаан боллоо. БОУАӨ-ийн сайд Ц.Сандаг-Очир хуралдааныг нээж хэлсэн үгэндээ “хоёр улс байгаль орчин, ой, цөлжилттэй тэмцэх салбарт олон жилийн туршид итгэлцэл, найрсаг харилцаагаа бэхжүүлж ирсэн. Үүний нэг тод илэрхийлэл нь "Ногоон хэрэм" төсөл юм. Хорь гаруй жилийн хугацаанд энэ төсөл ойжуулалт, цөлжилттэй тэмцэх санаачилгаас цогц хамтын ажиллагааны загвар болтлоо хөгжсөнд талархаж байна.

Төслийн эхний үе шат шар шороон шуурга, цөлжилттэй тэмцэх зорилтыг амжилттай хэрэгжүүлж, Төв, Өмнөговь аймагт нийт 3,046 га талбайд ойжуулалт хийж, 3 мод үржүүлгийн газар, 2 ойжуулалт, сургалтын төв байгуулан, 7900 гаруй мэргэжилтэн, иргэдийг сургасан нь ойн салбарын хүний нөөц, техникийн чадавхыг бэхжүүлэхэд чухал хувь нэмэр болж байгаа”-г онцлов.

Ногоон хэрэм төслийн одоо хэрэгжиж буй гуравдугаар үе шатны хүрээнд Сэлэнгэ аймагт ойн түймрийн эрт илрүүлэх систем, Өвөрхангай, Хөвсгөл аймагт бүсийн мод үржүүлгийн, сургалтын төв байгуулсан. Төв аймаг, Горхи-Тэрэлжид агро ой, хамтын ойн төглийн загвар төслүүдийг хөгжүүлж байгаа нь ойн салбарын тогтвортой хөгжлийн шинэ жишиг болж байна. Эдгээр ажил нь "Тэрбум мод" үндэсний хөдөлгөөний хэрэгжилтийг дэмжих бодит суурь болж байгааг дурдлаа.

Монгол, Солонгос хоёр улсын ойн салбарын хамтын ажиллагааны 10 дугаар хуралдаанаар "Ногоон хэрэм" төслийн дөрөвдүгээр үе шатыг эхлүүлэх хүрээнд санал солилцож, 2027–2031 онд өмнөх үе шатуудын ажлыг дүгнэж, амжилтыг үргэлжлүүлнэ. Мөн ойн салбарын шинэ технологи, судалгаа, генетик нөөц, үрийн сан үүсгэх, орчин үеийн мод үржүүлгийн газар, агро ойн аж ахуй, ойн түймрийн менежмент, дижитал технологи, хүний нөөцийн чадавхыг шинэ шатанд гаргах стратегийн ач холбогдолтой юм.