Өмнөд Солонгост таваас дээш хүн нэг дор цуглахыг хориглолоо

Өмнөд Солонгосын Сөүл, Инчон зэрэг томоохон хотуудад 12 дугаар сарын 23-наас ирэх 2021 оны 1 дүгээр сарын 3-ны өдрийг хүртэл 10 хоногийн хугацаанд таваас дээш хүн нэг дор цугларахыг хориглолоо. Ингэснээр клубуудын уулзалт, семинар, гэр бүлийн цугларалт, 60,70 насны ойн баяр зэрэг үйл ажиллагаа явуулах боломжгүй болж байна гэсэн үг юм. Харин оршуулга, хурим зэрэг онцгой үйл явдлыг харгалзан үзэж 50 хүртэлх хүний оролцоотойгоор хийхийг зөвшөөрч байгаа юм. Энэ захирамжийг зөрчсөн тохиолдолд хатуу арга хэмжээ ногдуулах юм. Ялангуяа хориглосон уулзалтыг хийсэн нь шалгалтаар илэрсэн тохиолдолд Халдварт өвчнөөс урьдчилан сэргийлэх хуулийн дагуу 3 сая вонын торгууль ногдуулах болон холбогдох зардлыг төлүүлэхээр болжээ. Өмнөд Солонгос улсад өнөөдрийн байдлаар нийт 50 591 халдварын тохиолдож бүртгэгдэж, 698 хүн нас бараад байна. Нэг өдөрт бүртгэгдэж буй халдварын тоо сүүлийн өдрүүдэд өндөр байгаа бөгөөд өнөөдөр/2020.12.21/ 926 тохиолдол бүртгэгдсэн байна.