ФРАНЦЫН СЕНАТЫН ГИШҮҮД МОНГОЛД АЙЛЧИЛЖ БАЙНА

УИХ дахь Монгол-Францын найрамдлын бүлгийн дарга Ж.Чинбүрэнгийн урилгаар Францын парламентын дэд дарга, хатагтай Натали Дэлатр тэргүүтэй сенатчдын албан ёсны айлчлал өнөөдрөөс эхэлж байна. Тав хоног үргэлжлэх айлчлалын бүрэлдэхүүнд Францын парламентын Нийгмийн бодлогын байнгын хорооны дэд дарга, Франц-Монголын найрамдлын бүлгийн дарга Филипп Мүэй, сенатын гишүүд Паскал Мартин, хатагтай Мари Пьер Ришэ, Завье Вэрн нар багтжээ. Энэ нь 2020-2024 оны УИХ-ын бүрэн эрхийн хугацаанд гадаадын парламентын гишүүдийн Монголд хийж буй анхны албан ёсны айлчлал юм. Францын парламентын гишүүд УИХ-ын дарга Г.Занданшатарт бараалхаж, Засгийн газрын гишүүд, УИХ дахь эмэгтэй гишүүдийн бүлэг зочдыг хүлээн авч уулзана. Фермерийн аж ахуй эрхлэгч айл өрх, Дорнод аймагт зочлон, хонины ноосоор органик бордоо үйлдвэрлэж экспортолдог үйлдвэрээр орно. Үндэсний ассамблейн гишүүд Онцгой байдлын ерөнхий газарт очиж, Францын хөнгөлөлттэй зээлээр агаараас аврах 111-р ангийг байгуулах төслийн явцтай танилцана.  "Airbus ЕС-145" загварын гурван нисдэг тэрэг, сургалтын бага оврын нэг нисдэг тэрэг нийлүүлж, онгоцны дадлага хийх симулятор, ангар, шатахуун цэнэглэх, хүйтний нөхцөлд нефть хадгалах станц байгуулж, нисгэгч, инженерүүдийг бэлтгэж байгаа юм. Гал түймэр унтраах 42 ширхэг тусгай тоноглолтой автомашин олгож эхлээд байна. Мөн ХСҮТ, ШУА, МУИС, тусгай хэрэгцээт хүүхдийн цэцэрлэгтэй танилцаж, хоёр улсын хооронд дипломат харилцаа тогтоосны 55 жилийн ойд зориулсан “Алс газраас сурахаар одогсод” номын нээлтэнд оролцоно. 1926-1930 онд буюу одоогоос 95 жилийн өмнө Францад суралцаж, баруун Европын “Хээрийн галуу нисэн үл хүрэх газар”-аас эрдэм өвөрлөсөн сэхээтнүүдийн үр хойчис энэхүү номыг эрхлэн гаргаж байгаа юм.