Засгийн газраас Хөтөлийн “Цемент шохой” компанийг төрд хүчээр авч, хувийн өмчид бүдүүлгээр халдаж байгаа талаар хэлэлцүүлэг нийгэмд өрнөөд байна. Тиймээс “Цемент шохой” компанийн хувьчлалыг тойрсон үнэн, худал мэдээллийг танилцуулъя. “Хөтөл” ХХК (хуучнаар Бэйзмент ХХК)-ийг анх УИХ-ын 2015 оны 07 дугаар сарын 03-ны өдрийн 70 дугаар тогтоол, Засгийн газраас 2015 оны 330 дугаар тогтоолыг тус тус үндэслэн хувьчлах жагсаалтанд оруулсан байдаг аж. Улмаар Хөтөлийн “Цемент Шохой” ХК-ийг 2015 онд 10 дугаар сард 41 орчим тэрбум төгрөгөөр хувийн хэвшилд шилжсэн. Хувьчилж авахаас өмнө болон авсны дараа Хөтөл ХХК-иас “Цемент Шохой” ХК-д технологийн шинэчлэл хийж, хуурай аргын технологи нэвтрүүлжээ. Үүнд арилжааны болон Хөгжлийн банкны санхүүжилтээр 200 гаруй сая ам.долларын хөрөнгө оруулалтыг сүүлийн 10 гаруй жилийн хугацаанд хийсэн байна.
