Хөгжлийн бэрхшээлтэй хүний хөгжлийн ерөнхий газар, Баянгол дүүргийн Нийгмийн хөгжлийн хэлтэс, Баянгол дүүргийн хөгжлийн бэрхшээлтэй хүүхдийн эрүүл мэнд, боловсрол, нийгмийн хамгааллын салбар комисс, Хөгжлийн бэрхшээлтэй хүүхдийн сэргээн засах хөгжлийн төв, Ерөнхий боловсролын 70 дугаар сургуультай хамтран зөвлөн туслах сургалтыг 2022 оны 10 дугаар сарын 17-24-ний өдрүүдэд Баянгол дүүргийн хамран сургах тойргийн 19, 28, 40, 93, 113, 146 дугаар сургууль, Сэтгэмж цогцолбор сургууль, Эрдмийн өргөө цогцолбор сургууль, Эрдмийн ундраа цогцолбор сургуулиудад тус тус зохион байгууллаа.
“Дэмжлэг баг”-ийн үйл ажиллагаатай танилцан гишүүдийг чадавхжуулах, ганцаарчилсан сургалтын хөтөлбөр боловсруулан ажиллаж байгаа багш нартай тулгамдаж буй асуудал, мэдээлэл, туршлага солилцох, барилга байгууламжийн дотоод болон гадаад орчны дэд бүтцийн үнэлгээ хийх, ажлын байранд нь зөвлөн туслах үйлчилгээ үзүүлсэн үр дүнтэй сургалт боллоо.
Зөвлөн туслах сургалтад Ерөнхий боловсролын 70 дугаар сургуулийн сургалтын менежер, согог зүйч, хэл засалч Б.Мөнгөнзагас, согог зүйч багш Б.Энхтуяа нар сургагч багшаар оролцож “Тусгай хэрэгцээ шаардлагатай хүүхдийг боловсролын үйлчилгээнд тэгш хамруулах нь”, “Хөгжлийн бэрхшээл, түүний төрөл, бэрхшээлийн онцлог байдал”, “Ганцаарчилсан сургалтын хөтөлбөр боловсруулах арга зүй” зэрэг мэдээллүүдийг хүргэж ажилласан. Тухайн сургуулиудад барилга байгууламжийн дотоод болон гадаад орчны дэд бүтцийн үнэлгээ хийж нэгтгэн зөвлөмжийг Баянгол дүүргийн ЗДТГ-ын Нийгмийн хөгжлийн хэлтэс хүргүүлэн ажиллахаар шийдвэрлэлээ.
