Чингис хаан Үндэсний музейг гурав хоногт 10 мянга гаруй иргэн үзжээ

Монгол Улсад орчин цагийн музей байгуулагдсаны түүхт 100 жилийн ойн хүрээнд Чингис хаан Үндэсний музейн нээлттэй өдрүүд үргэлжилж байна. “Музейн нээлттэй өдрүүд”-ээр Чингис хаан Үндэсний музейг: 3-р сарын 1-нд 2008 хүн үзсэний 605 нь буюу 30% нь хүүхэд, 3-р сарын 2-нд 3703 хүн үнэгүй үйлчлүүлсний 1467 нь буюу 40% нь цэцэрлэг, сургуулийн насныхан, 3-р сарын 3-нд 5118 үзэгч ирсний 2207 нь буюу 43% нь хүүхэд байв. "Музейн нээлттэй өдрүүд” арга хэмжээ 3 дугаар сарын 1-7-ны өдрүүдэд 09:00-16:00 цагийн хооронд “Музей үзэх соёлыг хэвшүүлцгээе” уриан дор үзэгчдийг хүлээж авч, үйлчилж байна. Энэ үеэр тус музейгээр үйлчлүүлэх үзэгчдийн урт дараалал үүсэж, хүүхдүүд гадаа даарах, томчуудтай шахцалдах, дайруулах, ядрах, өлсөх, цангах, ханиад томуу тусах эрсдэл үүсэж байгаа юм. Монгол Улсад үйл ажиллагаа явуулдаг, төрийн болон орон нутгийн өмчийн бүх музей 0-16 насны хүүхдэд үнэгүй үйлчилдэг. Тиймээс хүүхдүүд хэдийд ч музейг үнэгүй үзэх боломжтой. Иймд хүүхдүүдийг бусад үед ангиараа, найзуудтайгаа хамт ирж, Чингис хаан Үндэсний музейг тухтай үзэхийг урьж байна. Музейн хамт олны зүгээс  үзэгчдийг улавч өмсөж үйлчлүүлэхийг хүслээ.